Cynllun Lliniaru Llifogydd Gerddi Traphont Abermaw

Cynllun Lliniaru Llifogydd Gerddi Traphont y Bermo, Y Bermo, Gwynedd

Yn ystod y blynyddoedd diweddar, mae’r ardal a adnabyddir fel Gerddi’r Draphont yn y Bermo wedi dioddef llifogydd nifer o weithiau. Mae ffynhonnell y llifogydd yn gymhleth, ac mae wedi digwydd gan fod y môr yn gorlifo dros y morglawdd presennol gan foddi’r rhwydwaith dŵr wyneb presennol.

Mae llifogydd hefyd wedi digwydd pan fo rhwydwaith y dŵr wyneb wedi’i atal rhag llifo’n rhwydd gan ddyfroedd llanwol o ganlyniad i garthffosydd yn cael eu cloi gan y llanw, a difrodwyd y prif forglawdd yn ystod storm yn 2020, gan beri iddo ddymchwel yn rhannol.

Bydd y gwaith yn cael ei reoli gan y Prif Gontractwr, Griffiths, a fydd yn gweithio i Gyngor Gwynedd. Mae’r gwaith yn cynnwys adeiladu morglawdd newydd, wal eilaidd newydd, system dŵr wyneb newydd a gorsaf bwmpio gysylltiedig, yn ogystal â gosod pedair llifddor newydd a gwaith tirlunio cysylltiedig. Mae’r gwaith yn cynnwys y gweithgareddau canlynol:

• Bydd y morglawdd presennol yn cael ei ailadeiladu trwy ddefnyddio unedau concrid wedi’u rhag-gastio a chaiff ei orchuddio â gwaith maen a dorrir o gerrig yn y morglawdd presennol.
• Bydd rhan uwch newydd o forglawdd yn cael ei hadeiladu yn union y tu ôl i’r morglawdd a ailadeiledir, a bydd yn cael ei orffen gyda blociau cerrig.
• Bydd yr amddiffynfeydd meini ‘dros dro’ yn cael eu hailddosbarthu y tu blaen i’r morglawdd, a bydd cerrig llai ychwanegol yn cael eu hymgorffori fel bo’r angen.
• Gollyngfa dŵr wyneb newydd ar y traeth, ymhellach allan na’r draphont bresennol.
• Bydd yr ollyngfa a’r bibell bresennol ar y traeth yn cael eu symud ymaith.
• Llifddorau sengl a dwbl.
• Blwch rheoli ar gyfer gorsaf bwmpio danddaearol newydd a siambrau newydd (mae angen cadarnhau’r trefniant).
• Wal eilaidd newydd yng nghefn yr ardd, a fydd yn cael ei gorffen gyda blociau cerrig.
• Gylïau a siambrau newydd er mwyn i’r briffordd allu draenio’n well (mae angen cadarnhau’r trefniant).
• Bydd croesfan uwch i gerddwyr (cyfunol) yn cael ei chreu, gan ddisodli’r cerrig palmant presennol.
• Bydd y wal isel a’r rheiliau’n cael eu tynnu.
• Bydd llecyn palmantog yn cael ei gynnwys yng Ngerddi’r Draphont.
• Bydd rheiliau newydd yn creu terfyn allanol newydd ar gyfer gerddi’r draphont.
• Bydd rhan uwch newydd o forglawdd yn gostwng o 5.60 yn y gornel hyd at y ddaear o dan y draphont.